DEUR FRANCINE PRINS
Dit was met ’n byna angstige hart dat ek een aand na God uitroep terwyl ek terug dink aan die dag wat verby is. Geen buitengewone dag nie. Geen seldsame gebeurtenis wat gemaak het dat ek so gretig na God uitroep nie. Dit was net op daardie oomblik hierdie skielike versugting: “Here, moenie dat my lewe sinloos wees nie! Gebruik my!”
LEES OOK: Wit vlinders
Ek het verder gesmeek: “Moenie dat my lewe net om myself wentel nie! Moenie dat my lewe tevergeefs wees nie. Vergeef tog my selfsug, my selfgesentreerdheid, my selfbeheptheid …” Amper uitasem het ek die lysie afgerammel. Maar skielik is my woorde gesmoor. Ek het gevoel soos iemand wat nader getrek word in ’n stywe druk en ’n sagte skouer wat my stem stil maak.
Verbouereerd het ek daar getalm. In hierdie omhelsing van stilte. En oneindige barmhartigheid.
Geen antwoorde op my gretige gebed nie. Geen sagte fluistering van wysheid nie. Net ’n paar eenvoudige woorde wat die wind behoorlik uit my seile gevat het:
“Kom sit eers ’n bietjie by My.”
Hierdie windstilte. Hierdie vredige opdrag het my behoorlik van stryk gebring.
“Maar dit kan nie so eenvoudig wees nie!” wou ek uitroep, maar ek het stil gebly. Versigtig om hierdie heilige oomblik te koester.
Nog ’n rukkie van talm het my laat besef hoe moeilik hierdie eenvoudige opdrag van God is. Die makliker deel is die aksie, die doen, die perform. Soos Marta – “sy was baie bedrywig om alles klaar te kry,” skryf Lukas oor haar in die Nuwe Testament.
Dit is Maria wat die moeiliker deel gekies het. Sy het “aan die voete van die Here gaan sit en na sy woorde geluister.” ’n Ooglopend eenvoudige handeling. Maar dit vra baie.
LEES OOK: Vitamien S vir stilte
“Kom sit ’n bietjie by My,” vra jou ore en jou hande. Meer nog, dit vra jou hart. Dit vra dat jy stil word en luister. Kortom, dit vra jou alles. God vra jou alles.
Dis dalk juis hieroor dat iemand wat gereeld by God gaan sit en luister, se lewe nooit betekenisloos sal wees nie. “Kom sit ’n bietjie by My,” is ’n sleutel tot ’n lewe wat saak maak. Dis inderdaad ook een van die beste besluite wat ’n mens kan neem, soos Jesus self gesê het: “Maria het die beste deel gekies, en dit sal nie van haar weggeneem word nie” (Luk 10:42).
- Francine Prins is redakteur van LiG se gedrukte tydskrif en sosiale media. Volg haar skryfwerk by #weeslig en #francineprins.
