DEUR MILANIE VOSLOO
Hoeveel sal jy betaal vir jou gesondheid of om al jou ledemate te behou? Watter bedrag sal jy bereid wees om te betaal vir die behoud van goeie verhoudings met jou lewensmaat, jou gesinslede, jou goeie vriende? Wat sal jy betaal om dit te hê wat jy vandag het?
LUISTER:
Sonder om twee keer te dink, sal jy waarskynlik sê, alles wat ek het!
Hierdie dinge is vir my so kosbaar dat daar nie ’n prys aan gekoppel kan word nie. Dit beteken dus dat jy skatryk is. Dat jy ongeag alles wat jy nie het nie, steeds soveel wonderlike geskenke uit God se hand in jou besit het waarvoor jy dankbaar kan wees. Daar is eenvoudig soveel gewone dinge in jou lewe wat aan jou vreugde kan verskaf, elke dag.
LEES OOK: Leef ligter-luisterreeks: Waarom dink jy is jy hier?
Niks hiervan is nuus nie, ons weet dit maar te goed. Tog laat ons so dikwels toe dat die wêreld, sy mense, ons probleme, ons bekommernisse en ons uitdagings ons vreugde steel. Meer as dit, hoor ons mos net elke dag: Kry nog, wees nog, betaal nog. Gou-gou begin ons glo dat ons eers baie goed nóg moet versamel, voordat ons gelukkig en tevrede kan wees.
Op hierdie manier gaan die voordiehandliggende goeie en mooi dinge ongemerk by ons verby. Kyk ons eenvoudig die vreugdevoorreg van ’n oorvloedige lewe mis. Om elke dag met dankbaarheid te omhels, om die lig wat oor jou skyn raak te sien en dit bewustelik in te drink, vra deurlopende oefening. Ja, ons moet dit doelbewus doen. Dis ’n gewoonte waaraan ons onsself keer op keer moet herinner, veral wanneer ons onvergenoegd, ongelukkig en ontevrede voel oor die lewe.
Dankbaarheid, sê Brian McClaren, is ’n geestelike gewoonte wat sy vuis teen die wêreld se malligheid lig. Daardie uitgestrekte arm reik terselfdertyd uit na God. Wat hy daarmee sê is dat wanneer ons ons oë afhaal van die kunsmatige wêreld om ons wat uitskree dat ons net nog en nog moet hê en die kosbare dinge regtig raaksien, dan ervaar ons iets anders. Dan ervaar ons dat ons diep dankbaar is teenoor ’n God wat eintlik so baie vir ons gee dat ons so baie nog oor het om voor dankbaar te wees. Ons word dan weer stil-tevrede in onsself en met ons omstandighede.
LEES OOK: Leef ligter-luisterreeks: Christus het gekom omdat Hy weet hoe maklik ons struikel
Kom ek en jy kniel sommer net weer vandag en sê opnuut dankie vir alles wat ons het, alles wat ons lewe eintlik so skatryk maak. Kom ons wees weer dankbaar vir die gewone vanselfsprekende dinge, vir die mense rondom ons, vir lewe, vir God in ons. Kom ons wees vandag skatryk-dankbaar.
Gebed
Here, ek erken vandag, ek sien nie meer die vroegoggendstrale nie, ek hoor nie meer die koer van die duiwe nie, ek waardeer nie meer die mense rondom my nie, omdat ek so gefokus is op die spinnerakke in my solders en die leë plekke in my hart. Dít terwyl die spens van my siel volgepak is met alledaagse lewensvreugdes, gewone menswees-lekkertes en bottels vol ingelegde voorregte, Here. Ek bid vandag, maak my hartshuis se naam weer Dankbaar. Sodat ek soggens met verwagting die dag sal groet, heeldag u seën sal soek en saans sal tuiskom by ’n duisend-dankie-Here-vredes. Here, help my om gedurig te sing. Dankie, Here, vir soveel redes. AMEN
- In dié nuwe luisterreeks wil Milanie Vosloo gelowiges aanmoedig om in 2022 ligter te leef.
