Francine Prins
My tuiskantoor ruik na nat vleis en droë koljander.
Dié twyfelagtige reuk is alles die gevolg van ’n jagekspedisie en nuuskierigheid. My man het hierdie winter ’n blouwildebees teruggebring uit die Kalahari. Twee boude, twee blaaie, baie vleis! En ’n kop met horings en grillerige stukke vel aan.
Skielik is ek die assistent wat help om plek in die vrieskas te maak, my neus optrek vir die stukke rou vleis en die bloederige vel in die garage.
LEES OOK: Hoe mis ek die tussen-in-plekke
Maar bo alles is ek die hulp wat biltong sny, en nie regtig ’n idee het wat ek doen nie. Ek help maar om biltong te hang op ons wasgoedrak, terwyl ons dink aan waar ons dit vir die volgende paar weke permanent gaan hang. Die blink idee spring soos ’n ribbok in my kop: Die enkelbed in ons tuiskantoor het ’n draadmat – perfek vir biltonghakies en ’n lap om goggas weg te hou!
En dis nou waar nuuskierigheid ons het. Die drang om self uit te vind hoe dinge gedoen word. Hoe presies ’n mens vliese en senings afsny vir biltongvleis, hoe koljander geskroei en die soutmengsel gemaak word. Hoe om planne te maak vir uitdroog, en uiteindelik die smaak van jou eie biltong.
Deur die hele proses van ontdekking was ek maar grootliks gefrustreerd. Biltong maak is morsig en harde werk. Dit ruik nie lekker nie. Maar daar was ook lekkerte. Om saam-saam in die kombuis te werk, om die vleis uiteindelik daar te sien hang – kompleet soos in ’n slaghuis!
LEES OOK: Hou die lewe liggies vas
Ek kon skel of ek kon dankie sê vir hierdie hele affêre. Die lewe is mos maar ’n mengsel van frustrasie en vreugde. Ons kan kies watter deel ons ons wil aantrek. Soos die lewe ook maar ’n mengsel is van lig en donker, goed en kwaad, kritiek en komplimente. In elke oomblik het ons die keuse: Koester ons daardie gevoelens wat dood bring, of gryp ons die emosies aan wat lewe gee?
Ek is nou klaar geskel. Al ruik my tuiskantoor soos nat vleis en droë koljander, sal ek eerder dankie sê vir vleis om te eet, vir nuwe ervarings en iemand wat my saamneem op ’n reis van ontdekking.
Francine Prins is redakteur van LiG se gedrukte tydskrif en sosiale media. Volg haar skryfwerk by #weeslig en #francineprins
