“As ek bo (op die berg) kom, dan gaan ek vlieg soos ’n arend. Dan sal ek weer vry soos ’n voëltjie wees, en ek sal kan aangaan met my lewe.”

’n Jaar gelede het die 11-jarige Zhara du Toit uitgevind sy het ’n seldsame kanker in die membraan van haar longe. Daardie selfde aand het sy dié woorde in haar dagboek geskryf.

Dié brawe leerder van die Laerskool Lochnerhof in die Strand het in die maande daarna bekend geword vir haar positiwiteit. LiG het in Maart verlede jaar berig oor haar brawe kankerstryd en hoe sy boonop ander kinderkankerlyers met ’n handgemaakte skapie en ’n inspirerende boodskap bemoedig.

Gister (23 Januarie 2023) kon Zhara gelukkig tydens ’n toespraak by Cancercare Rondebosch-onkologiesentrum die volgende aankondig: “Die dag het aangebreek en ek is so dankbaar ek kan die klok lui om te vier dat ek kankervry is!”

Zhara het ook weer na die woorde in haar dagboek verwys en dankbaar aangekondig dat sy nou uitsien om haar besige lewe van voorheen te hervat. Sy het ook gesê: “Dit was ’n moeilike jaar met báie uitdagings. Maar ek het heeltyd geweet die Here is my herder, en Hy stap die pad saam met my. Hy het my regtig gedra.”

Haar bedankingslysie was lank. Sy het haar onkoloog dr Helder de Quintal, die verpleegsusters, haar ouers (Johan en Zachary), sussies (Annelize en Beatrice), familie, vriende maar ook almal wat vir haar gebid het, bedank.

Volgens Zhara het haar skapieprojek baie vir haar oor die afgelope jaar beteken. “In die tye wat die moeilikste was, het die skapies soveel vreugde in ons huis gebring.

“My grootste wens is dat elke kind wat kanker het gou gesond sal word.”