Daar kom tye in ’n mens se lewe wanneer gebed nie soos ‘n kragtige lewensboei tot by God voel nie – jy wonder hoe bid ek wanneer God stil voel. Want jy bid soos altyd. Jy gebruik woorde wat al jare lank deel van jou geloof is. Maar dit voel asof jou gebede teen die plafon vasslaan.

God voel stil. Ver. Onbetrokke.

Dit is ’n ervaring waaroor min mense openlik praat, maar baie van ons ken dit. Selfs toegewyde gelowiges wonder op een of ander stadium: Hoor Hy my nog? Is Hy nog hier?

God se stilte beteken nie dat God afwesigheid is nie

Een van die grootste vrese wanneer God stil voel, is dat Hy weg is. Dat jy iets verkeerd gedoen het. Dat jy jou geloof verloor het.

Maar die Bybel wys vir ons iets anders.

In Psalm 22 roep Dawid uit: “My God, my God, waarom het U my verlaat?”

Dit is dieselfde woorde wat Jesus aan die kruis gebruik het. Selfs Hy het die pyn van Godverlatenheid beleef.

God se stilte is dus nie ’n teken dat jy buite sy bereik is nie. Dit is deel van die geloofsreis. Weet dat stilte nie straf is nie. Sien dit eerder as ’n uitnodiging om dieper te groei.

Hoe bid ek wanneer God stil voel en my gebede leeg?

Miskien bid jy, maar jy voel niks. Geen emosie nie. Geen troos nie. Net woorde.

Dit help om te onthou: gebed is nie ’n gevoel nie. Dit is ’n verhouding.

In enige verhouding is daar oomblikke van intense verbondenheid, maar ook tye van stilte. Stilte beteken nie die verhouding is dood nie. Dit beteken net dat dit nie altyd dramaties voel nie.

Filippense 4:6-7 moedig ons aan: “Moet oor niks besorg wees nie, maar maak in alles julle begeertes deur gebed en smeking en met danksegging aan God bekend.”

Let op: dit sê nie jy moet eers vrede voel voordat jy bid nie. Jy bring jou bekommernisse soos wat jy dit beleef. Die vrede volg dikwels later – soms op ’n manier wat jy eers in terugskouing raaksien.

Wat kan ek bid wanneer ek nie weet wat om te sê nie?

Hoe bid ek wanneer God stil voel? Wel, wanneer God stil voel, raak baie mense onseker oor hoe om te bid. Moet jy harder probeer? Meer woorde gebruik? Meer geloof hê?

Romeine 8:26 bring groot troos: “Die Gees kom ons swakheid te hulp; want ons weet nie reg wat ons behoort te bid nie, maar die Gees self pleit vir ons met versugtinge wat nie met woorde gesê word nie.”

Jy hoef nie indrukwekkende gebede te bid nie. Soms is ’n eenvoudige sin genoeg:

“Here, ek weet nie wat om te sê nie, maar U ken my hart.”

Selfs ’n sug, trane en stilte kan gebed wees.

Leer om in stilte by Hom te sit

Ons leef in ’n wêreld waar stilte ongemaklik voel. Ons vul dit met musiek, gesprekke en skerms. Maar God werk dikwels juis in die stilte.

In 1 Konings 19 beleef Elia ’n dramatiese ontmoeting met God. Daar was ’n sterk wind, ’n aardbewing en ’n vuur – maar die Here was nie daarin nie. Daarna was daar “’n sagte fluistering”. Dít was waar God Homself openbaar het.

Wanneer jy wonder hoe bid ek wanneer God stil voel, kan dit wees dat Hy nie deur dramatiese tekens praat nie, maar deur ’n sagte innerlike sekerheid. Dit verg stilword. Dit verg wag. En vertroue.

Soms beteken bid wanneer God stil voel bloot om by Hom te bly sit, al voel dit leeg.

Hou aan, al voel dit klein

Jesus vertel in Lukas 18 die gelykenis van die weduwee wat aanhou vra het. Sy het nie opgegee nie, al het dit gelyk of daar nie reaksie kom nie.

Volharding in gebed beteken nie jy probeer God oortuig nie. Dit beteken jy hou vas aan die verhouding, selfs wanneer jy nie onmiddellike antwoorde kry nie.

Baie gelowiges kan getuig dat hulle eers later besef het hoe God in hul stiltetye gewerk het. Dinge het stadig verander. Hulle eie harte het sagter geword. Hulle perspektief het verskuif.

God is nader as wat jy dink

Wanneer God stil voel, kan die versoeking groot wees om terug te trek. Om minder te bid. Om moed op te gee.

Maar dalk is hierdie juis die tyd om eenvoudiger te bid. Stadiger. Eerliker.

Jy kan vir Hom sê:
“Ek mis U.”
“Ek verstaan nie.”
“Ek voel alleen.”

Hy skrik nie vir eerlike woorde nie. 

Die stilte is nie noodwendig leeg nie. Soms is dit vol van ’n teenwoordigheid wat ons eers later leer herken.

En selfs wanneer jy niks hoor nie, bly hierdie waarheid staan:

Hy is God.
Hy bly getrou.
Hy hoor – selfs wanneer Hy nie onmiddellik antwoord nie.

Wanneer God stil voel, beteken dit nie jou gebed is verniet nie. Dit beteken jy word genooi om dieper te vertrou.

En soms begin geloof juis daar – in die stilte.

Lees ook die artikel, Vitamien S vir stilte.