“Ek weet hoe dit voel om lank in ’n hospitaalbed te lê. Die verpleegsters en ander personeel was regtig vriendelik, en ek het baie gehou van die nuwe maats wat ek gemaak het. Maar ons kon nie regtig met mekaar speel nie, want die medisyne maak jou te siek om op te staan.”

So gesels die tienjarige Annabelle van Wyk van Stellenbosch oor haar belewenisse nadat sy jare gelede met leukemie gediagnoseer is. Sy was maar drie-en-’n-half jaar oud. Nadat haar gesondheid begin verbeter het, het sy en haar maatjies besluit om iets te doen om kinderkankerlyers se lang dae in die hospitaal op te vrolik.

LEES OOK: ‘Ek is kankervry!’ sê Zhara van mees gekykte getuienisvideo op LiG-kanaal

Uiteindelik is By kids 4 kids geskep, deur ’n klompie kinderkankerlyers vir hul maatjies: ’n inkleurboek met 50 inkleurprente. Annabelle vertel: “Dié boek sal jou help om die tyd in die hospitaal om te kry, en hopelik sal dit jou effens beter laat voel. Ek bid dat jy sal moed hou, dat jy gelukkig sal wees, en dat jy elke dag ’n glimlag op jou gesig sal hê.”

Elke inkleurprent het ook ’n briefie by waarin die vegtertjie bemoedig word. Carla van Eeden (10), wat reeds twee jaar lank teen kanker veg en tans ’n gewas op haar skedel het, skryf: “Sommige dae is regtig moeilik, maar ek is positief. Ek neem dit een dag op ’n slag. Jý kan dit ook doen omdat jy sterk en braaf is. Hou net aan veg!”

Karen Bock, Annabelle se ma, het gehelp om dié projek moontlik te maak. Sy sê: “Kinders wat kankerbehandeling ondergaan, bly steeds kinders. Hulle wil doen wat al die ander maatjies doen. Hulle wil buite speel, hulle wil lag, leer, nuwe dinge ervaar. En hulle wil skool toe gaan. Ongelukkig is dié dinge, as gevolg van die behandeling, nie altyd moontlik nie. Hulle bring dae en soms weke in ’n hospitaalbed deur, met nie veel om hulle besig te hou nie. 

“Dit is juis die rede vir die boek. Dit is deur kinders gemaak, vir kinders. Om hul tyd in die hospitaal net so ’n klein bietjie op te helder.”

Maar, sê Karen, hulle wil ook hê die inkleurboek moet ’n inspirasie wees vir mense wat nie kankerlyers is nie. “Dis ’n natuurlike reaksie om weg te skram van kinders met kanker, omdat dit so ’n onnatuurlike ervaring is. Die kinders voel ook baie keer sleg en ‘af’, maar hulle het geen ander keuse as om positief te bly nie. Om die beste van ’n slegte situasie te maak. 

“Net so moet ons, die volwassenes, wanneer ons ‘af’ dae beleef, positief bly soos dié dapper vegtertjies.”

Sy voeg by: “Ons het reeds 320 inkleurboeke by die Rooikruis-kinderhospitaal gaan aflewer, en 80 by Rondebosch Medical Centre in Kaapstad. Ons wil graag die nuus versprei oor dié inisiatief sodat ons hoop kan bring vir siek kinders dwarsoor ons land.”

• Klik hier en skenk geld vir ’n inkleurboek, kryte ingesluit, vir ’n kankervegtertjie.