Hierdie aktrise verkies rolle wat haar uitdaag om al die lae van haar menswees te ontdek en te verken. Dit sal noodwendig rolle wees, sê sy, wat haar uit haar gemaksone dwing. Deesdae is daar natuurlik ’n nuwe rol wat dit alles regkry, en meer – dié van ma. DEUR JANA DU PLESSIS MÜLLER
Klassieke skoonheid. Vrye gees. Kreatiewe siel. Dis moeilik om een woord te vind of ’n enkele frase te formuleer om haar mee op te som; die aktrise Erica Wessels is ’n vrou met vele lae wat haar menswees kenmerk. Boonop het sy ’n jaar gelede ma geword.
Ons ontmoet mekaar by The Alpaca Loom net buite die Paarl. Die waterplasse lê die wêreld vol ná die onlangse goeie reën. Erica is professioneel en gefokus vir ons voorblad-fotosessie. Sy is aantreklik. Misterieus in haar boheemse uitrusting, al staan sy ook by ’n trekker. Daar is ’n alpakka genaamd “Daniel” langs haar én modder onder haar stewels.
Haar lewe is besig en vol. “En kleurvol,” vertel sy later. Die dag ná ons gesprek meld sy haar weer, soos elke dag in hierdie besige tyd, by ’n rolprentstel aan waar daar ’n nuwe romantiese fliek geskiet word. En haar en haar man Willem se dogtertjie, Stella Kato, word binnekort’n jaar oud.
Om jouself te verloor
“Stella het ons lewe heeltemal kom verander,” sê Erica. “Dis ’n baie ‘real’ ondervinding; glad nie romanties nie. Maar dis nie onverwags nie. Die dag toe ek ’n ma geword het, het ek geweet my lewe sal nooit weer dieselfde wees nie.”
Wanneer Erica so praat, is haar stem melodieus, sterk. En wanneer sy oor Stella gesels, is daar ’n glimlag en sagtheid in haar oë.
“Daar is iets daaraan om ’n ma te word, iets wat baie mooi is. Jou fokus verskuif van jouself na hiérdie mens. Dis verreikend om jouself te verloor … én om jou dan daaraan oor te gee.
“Ek en Willem is albei denkers, maar wanneer daar ’n baba is om groot te maak, is daar nie tyd om oor allerlei dinge te tob nie. Jy maak jou hande vuil, jy raak besig. Hierdie nuwe mensie ontwikkel voor jou oë, dag na dag, week na week, maand na maand. Dis ’n proses wat net nooit ophou nie, en dis uiters opwindend.
Lees die volledige onderhoud in die Oktober-uitgawe van LiG!
FOTO’S: SALOMIEN SMAL
