Olivia Zwiegelaar vervul haar roeping voor haar naaimasjien. Hier maak sy rokke … maar nie sommer súlke rokke nie. Elkeen het byvoorbeeld ’n spesiale naam, en ’n mooi storie.
Deur Conette le Roux
Rebekah, Miryam, Yadid en Teshuah hang op ’n ry in die kas in Olivia Zwiegelaar (37) se naaldwerkkamer in Stellenbosch.
Rokke. Elkeen dra ’n naam wat ’n sterk verbintenis met die Bybel en die God van die Bybel het. Hulle moet genesing bring, hierdie rokke – vir die rokmaker én die uiteindelike eienaar. Olivia maak hulle, en verkoop hulle saam met ’n gebed uit haar hart.
’n Nuwe begin
Wanneer jy dié borrelende vrou se lewensverhaal moet aanhoor, wil jy kort-kort terugdeins. Soms is die besonderhede so skokkend dat jy onwillekeurig wonder hoe ’n mens dit alles kon oorleef.
Olivia vertel hoe sy op 16 haar ouerhuis in Somerset-Wes verlaat het, haar eie potjie begin krap het. En drank gevind het, en dagga, en bedenklike mansvriende.
Tien jaar lank. Totdat sy op 26 deur die lewe op ’n strand in Umhlanga uitgespoel is, en daar ’n einde aan alles wou maak.
Toe hoor sy ’n stem wat sy nie geken het nie. Een wat haar aansê om Lukas 11:11 te gaan lees. Sy het onthou van ’n Bybel iewers in ’n boks in haar blyplek. Haar oupa het dit nog vir haar gegee.
Sy het die Bybel gaan soek, tot by daardie vers geblaai, gelees tot by vers 13 – en besef: Daar ís ’n God …
Net hierna het Olivia na die Wes-Kaap teruggekeer, nader aan haar eertydse tuiste. En boonop al hoe nader aan God.
Vandag is Olivia swanger met haar vierde kind. Gelukkig getroud met Cobus, wat medisyne deur biotegnologie ontwikkel. “En ons leef in totale afhanklikheid van God,” vertel sy.
’n Nuwe roeping
Hier by 2015 rond het Olivia opnuut oor haar roeping nagedink. Is dit net om die beste ma te wees? het sy gewonder.
Toe ontdek sy, in ’n plaaswinkel, ’n hele pak rokpatrone uit die 1970’s. Haar onmiddellike aangetrokkenheid daartoe het haar verras. Maar daar, het sy besef, het sy haar roeping gevind.
“Die Here praat dikwels deur drome met my,” vertel Olivia. Op ’n keer droom sy van Rebekka en Isak en hoe dié Bybelse vrou haar in die openbaar bedek toe die aantreklike, hubare Isak na haar toe aangestap gekom het.
“Voor my huwelik het God my in my eie lewe kom wys hoe baie van my eie seksuele energie ek gebruik deur té stywe, té kort en té kaal klere te dra. Vroue moet waak daarteen om te veel energie te spandeer om aantreklik vir die wêreld te wees dat jy niks vir jou eie man oorhet nie …
“Ek het toe besef dat my kleredrag die produk is van die smagting na ’n vaderfiguur in my lewe. Daarom my, onbewustelike, behoefte aan mans se aandag.
“Maar ná die droom én ’n hele reeks ander gebeure het ek besef God het ’n spesifieke plan vir my. Ek moes rokke maak. Rokke met ’n profetiese boodskap.
“Ek het agtergekom hoe ek, én ons almal as Jesus se bruid, sóveel van ons oorspronklike bloudruk oor die jare verloor het. Dat die tyd vir genesing aangebreek het – eers in my eie hart, en dan in ander se hart.”
Elke rok het ’n storie
Olivia sê sy het besef dat daar ’n groot verskil tussen “vroulik” en “sexy” is – en so het sy haar begin toelê op die maak van “vroulike” rokke.
Só het Rebekah ontstaan, die eerste rok in haar Minjaka-reeks. Elke keer as sy hierdie rok vir iemand maak, is haar gebed dat die ontvanger ’n nuwe intimiteit met die Here en met haar man sal bereik.
“Ek bid dat daardie vrou intens bewus sal wees van haar waarde in Hom. Hoe kosbaar sy gemaak is. Hoe sy dié kosbaarheid weer in ’n ander se bekertjie sal kan skink.”
Na nóg ’n droom van ’n ma wat kledingstukke sorgsaam in ’n rivier was en dan alles los en met haar kindertjies speel wanneer hulle by haar aansluit, het sy die Miryam-rok gemaak.
Aanvanklik het sy gedink dit moet Eva heet. “Maar,” sê sy, “toe wys die Here my dat Miriam van kleins af ’n kosbare moedertjie was. Sy het haar ma van kleins af bygestaan en sonder om te skroom Farao se dogter genader toe haar boetie Moses se lewe in gevaar was.”
Met dié rok het Olivia besef God wil haar eie diep wonde genees, dit wat sy tydens haar grootwordjare met ’n gebroke ma opgedoen het. Sodat sy self ’n mamma sal wees soos wat sy in haar droom gesien het.
“My gebed vir almal met hierdie rok,” sê Olivia, “is dat ons genesing in ons eie mawees sal beleef. En dalk ook genesing wat ons eie mammas betref. Hulle was immers ook maar brose kleipotte …”
Toe het die Yadid-rok gevolg. Yadid is die Hebreeuse woord vir “geliefde”. Olivia vertel van haar geestelike belewenis wat tot hierdie rok aanleiding gegee het: “Ek het besef ek ervaar iets oor God se hart teenoor mense wat mekaar oordeel.
“My hartsgebed met hierdie rok is dat die Here self sy liggaam sal kom één maak. Dat die oordeel en die mure wat ons van mekaar skei, afgebreek sal word.”
Daar is boonop ’n mooi stertjie aan hierdie storie: Michelle-Lize van Wyk, ’n Stellenbosse kunstenaar, het op lap geverf en Olivia gevra om vir haar ’n rok te maak. Olivia het op die Yadid-rok besluit, en toe sy die rok saam met die gebruiklike boodskap en gebed aan Michelle-Lize gee, het laasgenoemde ook genesing gevind nadat sy vroeër baie seer in ’n kerk beleef het.
Olivia se vierde rok het by ’n mooi stuk lap begin. Toe sy ’n rukkie later ’n mooi patroon raakloop, het sy besluit dat dié twee by mekaar hoort.
Sy vertel: “Toe ek aan die rok begin werk, vra ek die Here: ‘Wie is sy, Here?’ Toe sê die Here sy is ’n oorwinnaar.”
Olivia vertel verder hoe God haar, terwyl sy aan die rok gewerk het, herinner het aan al háár oorwinnings saam met Hom. Hoe Hy haar net duskant selfdood kom red het, hoe Hy haar lewe radikaal verander het, hoe Hy haar van verslawing bevry het. En hoe Hy haar elke dag van die denkpatroon van ’n slagoffer bevry.
En só het Teshuah, wat “oorwinning” in Hebreeus beteken, gestalte gekry.
- Stuur ’n e-pos aan Olivia by info@minjaka.co.za vir meer inligting oor haar werk.
Getuienisse wat deur LiG gepubliseer word, weerspieël die skrywer se persoonlike ervaring en mening. Dit word geplaas soos ontvang en ons dra geen verantwoordelikheid vir die inhoud nie. Die verhale is nie bedoel as mediese of geestelike advies nie.
